6/28/2013

Prexubilacións na quinta do 64

Este ano andas a prexubilarse no ensino os que ían dous anos por diante de nós. Hoxe remata unha longa e dilatada carreira docente en Boiro Bernardino González Guerra. Onte os compañeiros despediron en Pontevedra a José Antonio Fernández Sucasas. Boas xubilacións aos dous.

6/27/2013

Infiltrados de Afonso Eiré

Hoxe presentou Afonso Eiré, o noso compañerio de Seminario de Lugo, a súa novela de non ficción Infiltrados. Ben acompañado na mesa por Tucho Calvo, Fernando Filgueira e Xosé Abilleira

6/22/2013

Xosé Mª Díaz Castro, Letras Galegas 2014

A RAG vaille dedicar as Letras no 2014 a este exseminarista moitos anos. Non é de Lugo pero si de Mondoñedo (foto). E hoxe saíu a nova de que despois de 400 anos o Seminario de Mondoñedo suprime a actividade docente por falta de vocacións, so funcionará coma internado. O mesmiño que aquel noso COU no que tan ben o pasamos. Pero no noso caso durou pouco o invento porque non floreceron as vocacións, quedaron murchas.
E falando de exseminaristas e poesía. O colaborador deste blog, Pedro J. Rovira di así:
Amizade:



Corazóns que latexan ao unísono

cando a vida os golpea e os maltrata.

Corazóns que se senten sempre unidos,

na ledicia ou na dolor que os abafa.



Miradas que traspasan o tempo e o espazo

para estar co amigo que as agarda.

Miradas cómplices, que o comparten todo,

e a cambio non esperan do outro nada.



Ter un amigo é ser dúas veces un.

É vivir dúas vidas dunha vegada.

Ter un amigo, amigo, ti o sabes ben,

foi terte a ti.

Grazas!
 


6/02/2013

O cisne, relato de Pedro J. Rovira



O CISNE

Paquito Dylan é un cisne que doou ao pobo de Belesar o meu benquerido amigo Pepe Rebolo. Coa súa impúdica exhibición de corpo belido fai as delicias dos visitantes que cada vez en maior número veñen gozar deste lugar paradisíaco na ribeira de Diomondi regada polo Pai Miño. Tras el, respectando a distancia súrica, nada humilde a súa parella, que por mor do noxento machismo císnico non se coñece no pobo por máis nome que o de “a femia”.
            Despois de disfrutar na Abacería O Batuxo rexentada por Marco, verdadeiro druída de Baco, dun exquisito xantar, regado cun mencía dos viñedos que circundan o lugar, sentei a contemplar dende o seu mirador o río que maxestoso se estendía aos meus pés.
            Paquito miroume altivo, esperando cobrar o tributo debido á súa beleza natural. Tireille un anaquiño de pan de millo, que el displicente colleu da auga con toda parsimonia. Pero de súbito dirixiu os seus ollos de divo cara arriba.
            Un neno en cadeira de rodas, dende a estrada, esforzábase en atraer cara a el a súa atención movendo frenético os seus braciños esbrancuxados.
            Paquito ten corazón de pallaso. Por iso pasou de min e do meu millo e dedicoulle ao neno unha sesión de voos acrobáticos que desataron unha sonora gargallada neste. A súa risa era tan contaxiosa, que sen darme nin conta eu tamén estaba a rir coma un parvo.
-  Mamá, mamá, lévame xunto ao cisne. Non ves que quere xogar comigo? –díxolle á nai coma se en iso lle fose a vida.
            A nai mirouno cos seus ollos resecos, pois de tanto chorar xa non lle quedaban bágoas. Non era posible. Trinta insuperables chanzos inclinados facían de barreira infranqueable entre a estrada e o pantalán ao que Paquito se subira esgotado polo seu maratoniano exercicio circense.
            O neno botouse a chorar. Non eran os berros finxidos dun neno contrariado. Non. Eran os saloucos calados de quen está afeito a sufrir.
Ao ver a súa anguria, sentinme mal de estar disfrutando de aquilo que estaba vedado para el. Pechei os ollos e un regueiro de amargas lágrimas comezaron a correr pola miña faciana. Ao chegar ao chan, estas lágrimas foron crecendo e crecendo ata converterse nun gran cachón que con grande estrépito caía ao río.
Non daba creto ao que estaba a pasar. O nivel do río medraba e medraba e o pantalán semellaba unha táboa de surf na que Paquito facía mil e un equilibrio para non caer.
            A auga subiu un, dous, tres, vinte metros. O neno vía cada vez máis preto del o cisne dos seus soños. Un metro máis e o pantalán quedou varado na mesma estrada, ao lado da cadeira de rodas.
            Con andares de pasarela de alto standing, Paquito foise acercando ao neno que o esperaba cos brazos abertos.
A cara do neno arroibou ata pórse coma a grana. Inutilmente tentou poñerse de pé e avanzar ao seu encontro.
O cisne apurou o seu paso para non alongar a súa impaciencia de poder tocalo e facerlle os máis tenros aloumiños. Os brazos do neno rodearon o seu corpo e el posou o seu longo colo no seu ombreiro.
Sentín non ser un bo pintor para deixar recollido no lenzo aquela xenuína estampa da felicidade.
- Mamá, mamá, quéreme! Mira como me quere!
            Sen explicarse de onde viñan, dúas bágoas azuis correron de novo polas meixelas da nai.
            A voz de Marco tróuxome de novo á realidade. Preguntoume se me gustara a comida. Díxenlle que si. Que todo estaba moi bo e que o viño era inmellorable.
- Alégrome que che gustara. É da colleita de hai dous anos, que foi a mellor e chegou a 14º de gradación. É unha serie limitada que reservo para os amigos e que ten por nome O lagar dos soños.

                                                                                                            Pedro J. Rovira